aiso puta devaki jayo
Krishna Bhajan
ऐसो पूत देवकी जायो। चारों भुजा चार आयुध धरि, कंस निकंदन आयो ॥१॥ भरि भादों अधरात अष्टमी, देवकी कंत जगायो। देख्यो मुख वसुदेव कुंवर को, फूल्यो अंग न समायो॥२॥ अब ले जाहु बेगि याहि गोकुलबहोत भाँति समझायो। हृदय लगाय चूमि मुख हरि को पलना में पोढायो॥३॥ तब वसुदेव लियो कर पलना अपने सीस चढायो। तारे खुले पहरुवा सोये जाग्यो कोऊ न जगायो॥४॥ आगे सिंह सेस ता पाछे नीर नासिका आयों। हूँक देत बलि मारग दीनो, नन्द भवन में आयो॥५॥ नन्द यसोदा सुनो बिनती सुत जिनि करो परायो। जसुमति कह्यो जाउ घर अपने कन्या ले घर आयो॥६॥ प्रात भयो भगिनी के मंदिर प्रोहित कंस पठायो। कन्या भई कूखि देवकी के सखियन सब्द सुनायो॥७॥ कन्या नाम सुनो जब राजा, पापी मन पछतायो। करो उपाय कंस मन कोप्यो राज बहोत सिरायो॥८॥ कन्या मगाय लई राजा ने धोबी पटकन आयो। भुजा उखारि ले गई उर ते राजा मन बिलखायो॥९॥ वेदहु कह्यो स्मृति हू भाख्यो सो डर मन में आयो। ’सूर’ के प्रभु गोकुल प्रगटे भयो भक्तन मन भायो॥१०॥
aiso pūta devakī jāyo। cāroṃ bhujā cāra āyudha dhari, kaṃsa nikaṃdana āyo ॥1॥ bhari bhādoṃ adharāta aṣṭamī, devakī kaṃta jagāyo। dekhyo mukha vasudeva kuṃvara ko, phūlyo aṃga na samāyo॥2॥ aba le jāhu begi yāhi gokulabahota bhām̐ti samajhāyo। hṛdaya lagāya cūmi mukha hari ko palanā meṃ poḍhāyo॥3॥ taba vasudeva liyo kara palanā apane sīsa caḍhāyo। tāre khule paharuvā soye jāgyo koū na jagāyo॥4॥ āge siṃha sesa tā pāche nīra nāsikā āyoṃ। hūm̐ka deta bali māraga dīno, nanda bhavana meṃ āyo॥5॥ nanda yasodā suno binatī suta jini karo parāyo। jasumati kahyo jāu ghara apane kanyā le ghara āyo॥6॥ prāta bhayo bhaginī ke maṃdira prohita kaṃsa paṭhāyo। kanyā bhaī kūkhi devakī ke sakhiyana sabda sunāyo॥7॥ kanyā nāma suno jaba rājā, pāpī mana pachatāyo। karo upāya kaṃsa mana kopyo rāja bahota sirāyo॥8॥ kanyā magāya laī rājā ne dhobī paṭakana āyo। bhujā ukhāri le gaī ura te rājā mana bilakhāyo॥9॥ vedahu kahyo smṛti hū bhākhyo so ḍara mana meṃ āyo। 'sūra' ke prabhu gokula pragaṭe bhayo bhaktana mana bhāyo॥10॥
