ratana saum janama gamvayau
रतन-सौं जनम गँवायौ हरि बिनु कोऊ काम न आयौ। इहि माया झूठी प्रपंच लगि, रतन-सौं जनम गँवायौ॥ कंचन कलस, बिचित्र चित्र करि, रचि-पचि भवन बनायौ। तामैं तैं ततछन ही काढ़यौ, पल भर रहन न पायौ॥ हौं तब संग जरौंगी, यौं कहि, तिया धूति धन खायौ। चलत रही चित चोरि, मोरि मुख, एक न पग पहुँचायौ॥ बोलि-बेलि सुत-स्वजन-मित्रजन, लीन्यौ सुजस सुहायौ। पर्यौ जु काज अंत की बिरियाँ, तिनहुँ न आनि छुड़ायौ॥ आसा करि-करि जननी जायौ, कोटिक लाड़ लड़ायौ। तोरि लयौ कटिहू कौ डोरा, तापर बदन जरायौ॥ पतित-उधारन, गनिका-तारन, सौ मैं सठ बिसरायौ। लियौ न नाम कबहुँ धोखैं हूँ, सूरदास पछितायौ॥
ratana-sauṃ janama gam̐vāyau hari binu koū kāma na āyau। ihi māyā jhūṭhī prapaṃca lagi, ratana-sauṃ janama gam̐vāyau॥ kaṃcana kalasa, bicitra citra kari, raci-paci bhavana banāyau। tāmaiṃ taiṃ tatachana hī kāḍha़yau, pala bhara rahana na pāyau॥ hauṃ taba saṃga jarauṃgī, yauṃ kahi, tiyā dhūti dhana khāyau। calata rahī cita cori, mori mukha, eka na paga pahum̐cāyau॥ boli-beli suta-svajana-mitrajana, līnyau sujasa suhāyau। paryau ju kāja aṃta kī biriyām̐, tinahum̐ na āni chuḍa़āyau॥ āsā kari-kari jananī jāyau, koṭika lāḍa़ laḍa़āyau। tori layau kaṭihū kau ḍorā, tāpara badana jarāyau॥ patita-udhārana, ganikā-tārana, sau maiṃ saṭha bisarāyau। liyau na nāma kabahum̐ dhokhaiṃ hūm̐, sūradāsa pachitāyau॥
